Сыктывдинское музейное объединение
Тел. 8 (82130) 7-14-40, Эл.почта: info@museum-syktyvdin.ru
26.12.2017

«Чужан сиктын олам – вылам»

Ӧшым тöлысь 26 лунö Ыбскöй лыддьысянiнын мунiс аддзысьлöм «Чужан сиктын олам – вылам». Аддзысьлöмыс вöлi сиöма коми гижысьлы, ыбса олысьлы, мортлы, кодлысь нимсö сизим во нин новлö сиктса лыддьысянiн - Владимир Иванович Безносиковлы. Талун сылы бы тырис öкмысдас арöс, а воан урасьöм тöлысьö лоас дас во, кыдзи Владимир Иванович кувсис. «Збыльысь кö, гижысь мортыд оз вермы лоны кöдзыд сьöлöмаöн. Сiйöс пыр майшöдлö миян олöмын паныдасьлысь унасикас нелючкияс да сьöкыдлунъяс, ас войтырлöн тöжд-дойяс. Буретш тадзи и позьö шуны Сыктывдiн районса Ыб сиктын олысь Владимир Иванович Безносиков йылысь». Тайö кывъяссö дас во сайын гижис коми писатель Иван Ильич Белых. Чолöмалiсны чукöртчысьясöс Сыктывдiнса культураöн веськöдлысь Андрей Иванович Порошкин, öкмысöд классын велöдчысь Полина Колегова, Ыбса школаöн веськöдлысь Галина Витальевна Колегова. Таво ыбса библиотека да школа öтвылысь лöсьöдiсны гожся лагерьлысь уджалан программа. Шойччан лагерьыс шусис «Чужан сиктын олам-вылам» да уджалiс школаын. Чукöртчысьяслы зэв ёна кажитчис видеофильм «Кымын кокаысь курöгъяс», кодöс вöчисны лагерьса челядь да налöн веськöдлысь, коми кыв велöдысь Елена Степановна Чабанова. Владимир Безносиков быдöнöс чуймöдiс аслас серамбана гижöдъяснас. Мый аддзылiс да кывлiс сиктса олöмсьыс, сы вылын и серавлiс да дивитлiс. «Непоседы» сьылан котыр сьылiс частушкаяс, кодöс лöсьöдiс сiдз жö Владимир Иванович. Владимир Безносиков ас кадö уджалiс и библиотекаын, и клубын. «Войвыв кодзув» журналын петавлiс сылöн интермедия «Ошкöм», кодöс чукöртчысьяслы петкöдлiсны Светлана Алексеевна Доронина да Елена Степановна Чабанова. Сэсся Ыбса библиотекаöн веськöдлысь Марина Геннадьевна Колегова нуöдiс ворсöм Владимир Иванович Безносиков олан да гижан туй кузя. Вöльгым тöлысьын библиотека да ТОС «Вичкодор» гижисны проект «Мультстудия «Катшасин» да вермисны Коми Республикаса велӧдан, наука да том йӧз политика министерстволöн конкурсын. Талун мультстудия петкöдлiс Владимир Безносиковлöн «Тувсов сиктын» кывбур кузя вöчöм мультфильм. Мультфильмсö лöсьöдiсны Ольга Алексеевна Игнатова, Сергей Анатольевич Юркин, Илона Темуровна Саутер да Марина Геннадьевна Колегова. Йирым тöлысьын Ыбса библиотекаын мунiсны Колеговскöй лыддьысьöмъяс, кодъяс йылысь висьталiс районса библиотекаса методист Людмила Николаевна Муравьева. Таво уна доклад вöлi сиöма Владимир Безносиковлы. Йöз водзын выступитiс и Светлана Андреевна Тюрнина, кодi медводдзвöн заводитiс тайö туялан уджсö. Уна бур кыв писатель йылысь висьталiсны дона гöсьтъяс ученöй Татьяна Леонидовна Кузнецова, Литературнöй музейöн веськöдлысь Диана Григорьевна Холопова, коми гижысь котырöн веськöдлысь Елена Васильевна Козлова, Владимир Иванович Безносиковлöн пияныс Валерьян Владимирович, Сергей Владимирович да сылöн гöтырыс. Бура уджалöмысь Марина Геннадьевна Колеговаöс пöся чолöмалiс и Ыбса ас морт нин, Сыктывдiнса «Коми войтырöн» да районса музейöн веськöдлысь Владимир Николаевич Муравьев. Районса библиотекаяс чукöрöн веськöдлысь Татьяна Альбертовна Крутова аттьöалiс бура уджалöмысь и Марина Колеговаöс, и сылысь отсасьяссö. А уджыс мунö нин водзö. Локтан Владимир Иванович юбилей кежлö библиотека лöсьöдас виртуальнöй небöг выставка да ыбса библиотекалысь сайт.

Комментарии

Комментариев пока нет

Оставить комментарий